Ана махаббаты қандай екен өзі? Осы бір ой келді маған бір сәтке. Ана деген ұлы сөз-ау. Асылында ананың балаға деген махаббаты, баланың анасына деген махаббатынан да биік. Себебі ана деген баласына еш уақытта реніш, кек сақтамайды. Рас, кейде аналар бізді сөгеді, ұрысады, бірақ олардың ашулары қар тәріздес тез ериді, тез тарқайды. Кейде осыны ұқпай, көңіліне қаяу түсіретін бір сөздер айтып қоямыз. Кейін сол үшін өкініп жатамыз. Ал, аналар ше, аналар қазір ұрысса, қазір күледі, жылы шыраймен ғана жимия салса барлық ренішің қайда кетіп қалғанын да байқамай қаласың. Ал, шынына келсек ананың қадірін тек аналы болғанда білесің ғой. Асыл анашыңның көз алдыңда қартайғанын көрсең, қолдарына, мойнына түскен әр бір әжімі, ағарған ақ тал шашы, аяғында іскен тамыры, осының барлығы жүрек түбінен жаралайтын іспеттес. Кейде осы үшін өзіңді жазғырасың, әттең анам үшін бір жақсылық жасасам ғой деп...
Асылында аналардың мінездері жұмсақ жібектей, нәзік гүлдей. Ес жия келе соны ұғасың, сен қуансаң бірге қуанып, сен мұңайсаң бірге мұңайып, қапаланып, өз-өзін қоярға жер таппайды. Сен үшін түн ұйқысын төрт бөлген. Саған жүруді, сөйлеуді, қолыңа қасық ұстауды үйреткен анаңа құрметпен қарау анамыз алдындағы өтелмес парыздарымыздың кішкентай ғана бөлшегі. Аналарымыз біздің жердегі періштелеріміз. Жаратушы Хақ Тағаладан кейінгі қамқоршымыз, жанашырымыз, біздің сырласымыз, құпия сақтаушымызда осы аналарымыз. Осындай қиын да жауапкершілігі мол қызметте жүрген аналарымыз, бізден ақысын сұрамайды. Керсінше біздің тілеуімізді тілеп, әрдайым дұғада болады. Біз кейде осының қадірін түсінбейтініміз өкінішті. Жер бетіндегі аналардың баршасы аман жүрсінші, ешбірі қамқоршысыз қалмасыншы. Қарттар үйіндегі аналар мен аталар қараусыз қалмасыншы. Әр бір жан "Анашым мен сізді сүйемін" деген сөзді жиі айтып, жылы шырай танытса екен деп тілеймін. Анашым мен сізді сүйемін. Ухиббук иа умми!

авторы Диана Муслима